გივი სიხარულიძე

(გივი სიხარულიძეს)

საცა ყველა ბრძენს თამაშობს
შენ ირჩიე როლი გიჟის
ენაბილწს და ლაზღანდარას
გულში ანგელოზი გიზის.
ერთსაც ვიტყვი - შენი ვერცხლი
მუდამ ჯობნის სხვების ოქროს,
ამ უსქესო ასაბიამ
რაც არ უნდა იბობოქროს.
მოგდევს ლამაზების გუნდი -
უყვარხარ და გიყვარს შენაც.
ვისაც უნდა დაექციე,
სწორედ იმან აგაშენა.
იცინი თუ იცრემლები?! -
კაცი ბჭობს და, ღმერთი ხედავს.
საით მიგაქროლებს ბედი
ასე თავაწყვეტილ მხედარს.
მე - ასკეტი, შენ - ბოჰემა,
ერთად ვილხენთ ქალაქურად;
ჩვენ უბრალო ხალხი გვიჯობს
სახელიან ხარახურას.
ღმერთმა გისაშველოს მინდა
უკუღმართს და უსაშველოს.
ნაღდი საძმო ცაში გვიცდის,
მაინც, ნუ ვიჩქარებთ, ძველო!

ვახტანგ ღლონტი